(1953) Molín del Profundu

link

Molin del Profundu, 
llenu de recuerdos de míos mocedaes. Si cierro los gueyos paezme tate viendo entre coses nidies, cual si fos soñaes.

Veo les palombes 
enriba tos teyes rullando amoroses, cebar los pichones, o xuntar sos picos pa per lo baxino dicise les coses.

Los dis calurosos 
dante fresca sombra copudos nozales, y al frente to puerta, o per los costaos, vierten sos perfumes pinchudos rosales.

Y cuando en inviernu
tapa los pegoyos la neve xelada, 
adientro ye un fornu, pos un gran samantu formen los nozales con toa so ramada.

Entre les xuncleres 
que hay en tos orilles, do canten les ranes, diz el molineru que, en noches de lluna siéntense sospiros que llancien les xanes.

El ríu traxineru 
que naz en el monte y baxa ruidosu, al pasar to vera falágate siempre, ya vaiga tranquilu o vaiga rabiosu.

Y facen esquiebres 
les pintones truches nel agua saltando, cazando les mosques, o quiciás creyendo que, igual quel ñervatu, pueden dir volando.

Los Ilondros, per llistos, 
xunt'a to represa cuerren a encuevase, pos en el remansu hay truches y anguiles p'antroxar fartucos en sin esmolguiase.

Mientres que to muela, 
con suave murmuriu, ta'l trigu moliendo, les hores tranquiles pasen galvanoses 
y una paz muy fonda te va adurmeciendo.

¡Virxen milagrosa
qu'en Llugás esperes pa calmar dolores!
Cudia que te siempre, allá nel Profundu,
el Molín benditu de los míos amores.